Archiv


Das Digitale Logbuch: Widmungen

Also s'isch ja wirklich viel los dies Jahr. Mir henn's Mozartjahr. Der Kerle wär jetzt a schon 250 geworden, wenn er no leben tät. Das Rembrandtjahr. Das Jahr des echten Thymian, thymus vulgaris, gell? Passt gut zu Linsen und Spätzle. Und die Naturschitzer saget, s'wär s’Jahr vom Marienkäferle, genauer gesagt: von Siebenpunkt-Marienkäferle. S'koscht halt nix, wenn man sagt, s'wär s'Jahr von irgendebbes.

Von Achim Killer |
    Des hat sich wahrscheinlich a der Ridgers denkt, do der Minischderpräsident vom Ruhrgebiet, und deswäge hat er gmonint, 2006 wär das Jahr des Kindes. Des isch halt oifach billiger als Kinderschule zsbaue. Wenn der net so komisch schwätze tät, der Ridgers, do kennt man fascht moine, s'wär n'Schob. Ha ja, un an de Unis, do henn se natirlich au nie Geld. Un deswäge isch bei denne alldritt a neis Jahr. Unlängst war’s Einsteinjahr und jetzt hemmer’s Informatikjahr. Au, ganz gescheite Leit schwätze do immer. Aber i vesteh’s halt net. Do, des, was de Einstein gemoint hat, mit Raum un Zeit un Raumzeit, un die wär krumm. Uff Sache isch der komme. I versteh des net, obwohl der ja aus Ulm komme isch, der Einstein, un i ihn von daher eigentlich scho verstehe misst.

    Und des mit der Informatik erst, mit denne Computer. Leit, isch des schwer. Mei PC. Dauernd komme do so Fählermeldungen. Fähler, Fähler, Fähler – wie de Klinsmann. Un iwwer solche Sache schwätze die jetzt beim Informatikjahr. Diskutieren tun sie, wie man uff Hochdeitsch sagt, Reden halten. Iwwer E-Government, und IT Systems Engineering. Also i komm do net mit. Und deswäge isch mir persönlich des Jahr von dem Siebenpunkt-Marienkäfer eigentlich au viel lieber. Des isch so a schaffig Viechle. Im Garten: alle Blattläus frisst des weg. Wenn d’nohgugsch, hat’s Maul voll mit Blattläus. Und scho deswäge schwätzt’s koine Sache raus, die wo i net versteh.